Saratul-humaza

• Suratul-Humaza (104): Imeteremshwa Makkah, Ina Aya Tisa.

Kwa jina la Mwenyezi Mungu, Mwingi wa Rehema, Mwenye Kurehemu.

1. Adhabu kali itamthubutikia kila mwenye kuramba kisogo, asengenyaye, msengenyaji.
2. Ambaye amekusanya mali na kuihesabu (tu bila ya kuitumia katika njia za kheri).
3. Anadhania kuwa mali yake itambakisha milele.
4. Hasha! Bila shaka atavurumishwa katika (moto unaoitwa) Huttama.
5. Na ni jambo gani litakalokujulisha (hata ukajua) ni nini (huo moto unaoitwa) Huttama?
6. (Huo ni) moto wa Mwenyezi Mungu uliowashwa (kwa ukali bara bara).
7. Ambao unapanda (mpaka) nyoyoni.
8. Hakika watafungiwa ndani ya moto huo.
9. Kwa manguzo marefu (ili wasiweze kutoka).

Mafunzo kwa Ufupi.

1. Kusengenya ni katika makosa makubwa kabisa.
2. Ni makosa makubwa kukusanya mali bila kuitumia katika njia za kheri.
3. Matumizi mabaya ya ulimi na neema zingine hupelekea kwenye maangamizi na adhabu.
4.  Matumizi mabaya ya ulimi kama fitna, uongo, usengenyi, n.k. huleta chuki, husda na mtafaruku katika jamii.